ສຳນັກຂ່າວ ຕ່າງປະເທດ ລາຍງານ ຈາກ ນະຄອນຫລວງ ພະນົມເປັນ ປະເທດກຳປູເຈຍ ເມື່ອບໍ່ດົນມານີ້, ກໍາປູເຈຍ ມີບ້ວງເງິນກູ້ຢືມ ມູນຄ່າ 26,8 ລ້ານໂດລາ ສະຫະລັດ ໃນແຜນງົບປະມານ ປີ 2026
ເພື່ອເປັນເງິນທຶນ ໃນໄລຍະທຳອິດ ຂອງ ໂຄງການ ຄອງຟູນັນເຕໂຊ ຊຶ່ງຈະດຳເນີນການ ພາຍໃຕ້ ການລົງທຶນຂອງ ກຳປູເຈຍ 51% ແລະ ຈີນ 49% ຈາກເດີມທີ່ເຄີຍຢືນຢັນວ່າ ຈີນ ຈະລົງທຶນ 100%.
ບ້ວງເງິນກູ້ຢືມດັ່ງກ່າວ ຈະເປັນການຈັດສັນ ພາຍໃຕ້ ກອບສິນເຊື່ອ ຂອງ ລັດ ໃຫ້ແກ່ ໜ່ວຍງານ ລັດວິສາຫະກິດ ສອງແຫ່ງຄື ບໍລິສັດທ່າກຳປັ່ນ ອິດສະລະພະນົມເປັນ (ພີພີເອພີ) ແລະ ບໍລິສັດທ່າກຳປັ່ນ ອິດສະລະສີຫຸນວິລ (ພີເອເອສ) ໂດຍການ ຈັດຫາເງິນທຶນ ຕ້ອງໃຫ້ສອດຄ່ອງກັບ ລຳດັບ ຄວາມສຳຄັນ ທາງຍຸດທະສາດ ຂອງ ຊາດ ແລະ ຕ້ອງມີການຈັດການ ພາຍໃນ ນະໂຍບາຍ ການເງິນ ແລະ ເສດຖະກິດ ຂອງ ລັດຖະບານ.