ລາວ ໄດ້ວາງຄາດໝາຍ ສ້າງລາຍຮັບເຂົ້າປະເທດໄຫ້ໄດ້ເຖິງ 8 ຕື້ໂດລາສະຫະລັດ ພ້ອມຕັ້ງເປົ້າດຶງດູດນັກທ່ອງທ່ຽວຕ່າງປະເທດໃຫ້ໄດ້ 22 ລ້ານເທື່ອຄົນ ໃນໄລຍະ 5 ປີຕໍ່ໜ້າ.
ຕົວເລກຄາດໝາຍໃໝ່ນີ້ ຖືວ່າເປັນກຳລັງຂັບເຄື່ອນສຳຄັນໃນການພັດທະນາເສດຖະກິດ-ສັງຄົມ ເຊິ່ງສູງກວ່າສະຖິຕິໃນໄລຍະ 5 ປີຜ່ານມາ ທີ່ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມທັງໝົດ 20,1 ລ້ານເທື່ອຄົນ.
ນີ້ຄືການສະແດງໃຫ້ເຫັນເຖິງຄວາມມຸ່ງໝັ້ນຂອງລັດຖະບານ ທີ່ຈະຊຸກຍູ້ໃຫ້ຂະແໜງການທ່ອງທ່ຽວເປັນ “ຫົວຈັກຫຼັກ” ໃນການຟື້ນຟູ ແລະ ຂັບເຄື່ອນເສດຖະກິດແຫ່ງຊາດໃຫ້ເຕີບໂຕຢ່າງແຂງແຮງ.
ໃນກອງປະຊຸມໃຫຍ່ ຄັ້ງທີ XII ຂອງພັກປະຊາຊົນ ປະຕິວັດລາວ ທີ່ຈັດຂຶ້ນໃນອາທິດຜ່ານມາ, ທ່ານ ສອນໄຊ ສີພັນດອນ, ນາຍົກລັດຖະມົນຕີ, ໄດ້ນຳສະເໜີຮ່າງບົດລາຍງານແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030). ທ່ານໄດ້ເນັ້ນໜັກວ່າ ການທ່ອງທ່ຽວຈະຍັງຄົງເປັນບຸລິມະສິດສຳຄັນໃນໂຄງສ້າງເສດຖະກິດຂອງປະເທດ ເພື່ອສ້າງແຫຼ່ງລາຍຮັບເປັນເງິນຕາຕ່າງປະເທດ.
ເພື່ອບັນລຸວິໄສທັດດັ່ງກ່າວ, ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງວັດທະນະທຳ ແລະ ການທ່ອງທ່ຽວ, ໄດ້ເປີດເຜີຍວ່າ ກະຊວງຈະສຸມໃສ່ການປັບປຸງພື້ນຖານໂຄງລ່າງ, ການຍົກລະດັບມາດຕະຖານການບໍລິການໃຫ້ໄດ້ມາດຕະຖານສາກົນ ແລະ ການພັດທະນາເສັ້ນທາງທ່ອງທ່ຽວເຊື່ອມຕໍ່ພາກພື້ນ ພາຍໃຕ້ຂອບການຮ່ວມມືອະນຸພາກພື້ນແມ່ນ້ຳຂອງ (GMS).
ຄາດໝາຍດັ່ງກ່າວ ສອດຄ່ອງກັບການຈັດອັນດັບຂອງສື່ສາກົນ ໂດຍຫຼ້າສຸດ ວາລະສານ Indie Traveller ໄດ້ຈັດໃຫ້ ສປປ ລາວ ເປັນໜຶ່ງໃນ “26 ສະຖານທີ່ທ່ອງທ່ຽວລາຄາຖືກທີ່ໜ້າອັດສະຈັນສຳລັບປີ 2026”. ໂດຍລະບຸວ່າ ລາວເປັນປະເທດທີ່ມີຄວາມຄຸ້ມຄ່າສູງ (Value for Money) ເຊິ່ງນັກທ່ອງທ່ຽວສາຍປະຢັດມີຄ່າໃຊ້ຈ່າຍສະເລ່ຍພຽງ 17-25 ໂດລາຕໍ່ມື້ ເທົ່ານັ້ນ.
ດ້ວຍລາງວັນຈາກສື່ລະດັບໂລກ ເຊັ່ນ Travel+Leisure ແລະ Smart Travel Asia ທີ່ມອບໃຫ້ເມືອງມໍລະດົກໂລກຫຼວງພະບາງ ແລະ ແຫຼ່ງທ່ອງທ່ຽວທຳມະຊາດອື່ນໆ, ລັດຖະບານໝັ້ນໃຈວ່າຈະສາມາດບັນລຸຕົວເລກລາຍຮັບ 8 ຕື້ໂດລາ ແລະ ຍົກລະດັບອຸດສາຫະກຳການທ່ອງທ່ຽວລາວໃຫ້ກ້າວສູ່ລະດັບສາກົນຢ່າງເຕັມຕົວ.