ໃນວັນທີ 3 ຕຸລາ 2025, ບໍລິສັດ ຜະລິດ-ໄຟຟ້າລາວ ມະຫາຊົນ (EDL-Gen) ແຈ້ງໃຫ້ຊາບວ່າ : ຈະໄດ້ເພີ່ມການລະບາຍນ້ຳ ເພື່ອຮັກສາຄວາມປອດໄພ ໃຫ້ກັບທຸກພາກສ່ວນ ຕາມຂັ້ນຕອນທາງດ້ານເຕັກນີກວິຊາການ ເນື່ອງຈາກມີພາຍຸໝູນເຂດຮ້ອນ “ແມດໂມ” ກຳລັງເຄື່ອນທີ່ເຂົ້າມາ ເຊິ່ງຈະມີຝົນຕົກໜັກ ຫາ ໜັກຫລາຍ ເຮັດໃຫ້ລະດັບນ້ຳໃນອ່າງເກັບນ້ຳເຂື່ອນນໍ້າງື່ມ 1 ໄດ້ເພີ່ມຂຶ້ນ.
ປະລິມານນ້ຳທີ່ລະບາຍເພີ່ມ: ປະລິມານນ້ຳທີ່ໄດ້ໄຫລອອກຈາກເຂື່ອນໄຟຟ້ານ້ຳງື່ມ 1 ລວມທັງໝົດຈະເພີ່ມຂຶ້ນຈາກ 894.40 ແມັດກ້ອນຕໍ່ວິນາທີ ມາເປັນ 974.40 ແມັດກ້ອນຕໍ່ວິນາທີ .
ການເພີ່ມການລະບາຍນ້ຳນີ້ ຈະເຮັດໃຫ້ລະດັບນ້ຳທ້າຍເຂື່ອນເພີ່ມຂຶ້ນອີກປະມານ 15-20 cm.
ການເພີ່ມການລະບາຍນໍ້າ, ປະລິມານນ້ຳຈະເຮັດໃຫ້ຫຼາຍພື້ນທີ່ລຸ່ມຂອງເຂື່ອນມີຄວາມສ່ຽງນ້ຳຮອດຈຸດຖ້ວມເຊັ່ນ :
• ຈຸດວັດແທກ ບ້ານຈຸ້ມ : ໃກ້ເຖິງຈຸດເຕືອນໄພທີ່ສຸດ, ເຫຼືອພຽງ 0.10 ແມັດ.
• ຈຸດວັດ ທີ່ລາດ : ຍັງເຫຼືອ 1.30 ແມັດ ເຖິງຈຸດນ້ຳຖ້ວມ (13.60 ແມັດ).
• ຈຸດວັດ ບ້ານປາກກາຍຸງ : ຍັງເຫຼືອ 1.72 ແມັດ ເຖິງຈຸດນ້ຳຖ້ວມ (12 ແມັດ).
ສໍາລັບ ການໄຂປະຕູນໍ້າລົ້ນ ຂອງເຂື່ອນໄຟຟ້ານໍ້າງື່ມ 1 ແມ່ນຈະເລີ່ມປ່ອຍ ວັນທີ 4 ຕຸລາ 2025 ເວລາ 10:00. ດັ່ງນັ້ນ, ຈຶ່ງແຈ້ງປະຊາຊົນລຽບຕາມແມ່ນໍ້ງື່ມ ໃຫ້ມີສະຕິ ແລະ ຍົກຍ້າຍສິ່ງຂອງຂຶ້ນສູ່ບ່ອນສູງທັນທີ ຍ້ອນລະດັບນ້ຳຈະເພີ່ມຂຶ້ນ 15-20 cm ພາຍຫລັງການປັບປະຕູນ້ຳລົ້ນ ແລະ ຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.
