ເຈົ້າໜ້າທີ່ນະຄອນຫຼວງວຽງຈັນຈະນຳໃຊ້ເຈົ້າໜ້າທີ່ຕຳຫຼວດຫຼາຍກວ່າ 2,000 ຄົນເພື່ອຮັກສາຄວາມປອດໄພ ແລະ ຄວາມເປັນລະບຽບຮຽບຮ້ອຍໃນລະຫວ່າງງານບຸນທາດຫຼວງ ແລະ ງານວາງສະແດງສິນຄ້າ 2025, ເຊິ່ງຈະຈັດຂຶ້ນໃນວັນທີ 1-5 ພະຈິກ ທີ່ທາດຫຼວງ ແລະ ສູນວາງສະແດງສິນຄ້າລາວ-ໄອເຕັກ.
.
ອະນຸກຳມະການປ້ອງກັນງານບຸນນະມັດສະການພຣະທາດຫຼວງ ແລະ ງານວາງສະແດງ-ຂາຍສິນຄ້າ ປະຈຳປີ 2025 ລະບຸວ່າ ຈະມີເຈົ້າໜ້າທີ່ຕຳຫຼວດ 2,015 ຄົນປະຈຳການຢູ່ໃນພື້ນທີ່ສຳຄັນ: ໜ່ວຍງານໜຶ່ງຈະປະຈຳການຢູ່ສະຖານທີ່ຈັດງານບຸນ ແລະ ອີກໜ່ວຍງານໜຶ່ງຈະຄຸ້ມຄອງການຈະລາຈອນທົ່ວນະຄອນຫຼວງວຽງຈັນ.
ເຈົ້າໜ້າທີ່ຕຳຫຼວດເພີ່ມເຕີມຈະລາດຕະເວນຢູ່ທາງແຍກທີ່ສຳຄັນ, ຈຸດກວດກາ ແລະ ສະຖານີຕຳຫຼວດນະຄອນຫຼວງທັງເກົ້າແຫ່ງເພື່ອຕອບສະໜອງຕໍ່ເຫດສຸກເສີນຢ່າງວ່ອງໄວ ແລະ ຮັກສາການຈະລາຈອນໃຫ້ຄອ່ງໂຕ.
ຕຳຫຼວດໄດ້ຮຽກຮ້ອງໃຫ້ປະຊາຊົນ, ຜູ້ຂາຍ ແລະ ນັກທ່ອງທ່ຽວປະຕິບັດຕາມລະບຽບການຂອງງານບຸນ, ປົກປ້ອງຊັບສິນສ່ວນຕົວ, ແລະ ໃຊ້ບ່ອນຈອດລົດທີ່ກຳນົດໄວ້ເທົ່ານັ້ນເພື່ອຫຼີກລ່ຽງການຈະລາຈອນຕິດຂັດ ແລະ ການລັກຂະໂມຍ.
ເຈົ້າໜ້າທີ່ຍັງໄດ້ແນະນຳໃຫ້ຜູ້ເຂົ້າຮ່ວມງານບຸນກວດສອບລະບົບໄຟຟ້າກ່ອນອອກຈາກເຮືອນ. ຫຼີກລ່ຽງການຖືເງິນສົດຈຳນວນຫຼວງຫຼາຍ ແລະ ຕິດປ້າຍຊື່ພໍ່ແມ່ໃສ່ກະເປົາຂອງເດັກນ້ອຍ ປ້ອງກັນເດັກນ້ອຍ ພັດຫລົງຈາກພໍ່ແມ່.
ຫ້າມການໃຊ້ອາວຸດ, ລະເບີດ, ດອກໄມ້ໄຟ, ໂຄມໄຟທ້ອງຟ້າ ແລະ ສິ່ງຂອງຕ້ອງຫ້າມອື່ນໆຢ່າງເຂັ້ມງວດ ຍົກເວັ້ນແຕ່ບຸກຄົນທີ່ໄດ້ຮັບອະນຸຍາດຈາກເຈົ້າຫນ້າທີເທົ່ານັ້ນ. ຜູ້ທີ່ຕ້ອງການບິນໂດຣນ ຈະຕ້ອງລົງທະບຽນກັບຄະນະກຳມະການຈັດງານກ່ອນທີ່ຈະບິນໃນພື້ນທີ່ຈັດງານໄດ້.
ເຈົ້າໜ້າທີ່ກ່າວວ່າ ແຜນການຮັກສາຄວາມປອດໄພນີ້ແມ່ນເພື່ອຮັບປະກັນການສະເຫຼີມສະຫຼອງທີ່ປອດໄພ, ເປັນລະບຽບ ແລະ ມ່ວນຊື່ນ ພ້ອມທັງໃຫ້ກຽດແກ່ມໍລະດົກທາງວັດທະນະທຳຂອງລາວ.