ສໍານັກເລຂາທິການນາຍົກລັດຖະມົນຕີເນປານ ເປີດເຜີຍໃນວັນທີ 10 ກັນຍາວ່າ: ເນປານຄາດວ່າຈະຕ້ອງໃຊ້ເງິນ 4.74 ພັນລ້ານໂດລາ ເພື່ອບູລະນະ ແລະ ຟື້ນຟູພື້ນທີ່ທາງພາກເໜືອຂອງປະເທດ ຫລັງເກີດເຫດນໍ້າຖ້ວມກະທັນຫັນ ແລະ ດິນເຈື່ອນຄັ້ງໃຫຍ່ໃນວັນທີ 26 ສິງຫາ 2026.
ໂຕເລກດັ່ງກ່າວມາຈາກລາຍງານການປະເມີນຄວາມເສຍຫາຍ ແລະ ຄວາມຕ້ອງການຢ່າງຮີບດ່ວນ (Rapid Damage and Needs Assessment ຫລື RDNA) ເຊິ່ງຈັດດຍຄະນະດ້ານເຕັກນິກຮ່ວມຈາກຄະນະກໍາມະການວາງແຜນແຫ່ງຊາດ ແລະ ສໍານັກງານຫລຸດ ແລະ ແກ້ໄຂຄວາມສ່ຽງຈາກໄພພິບັດແຫ່ງຊາດຂອງເນປານ (NDRRMA).
NDRRMA ລະບຸວ່າ: ເຫດການນໍ້າຖ້ວມ ແລະ ດິນເຈື່ອນຄັ້ງນີ້ສົ່ງຜົນເຮັດໃຫ້ມີຜູ້ເສຍຊີວິດ 1,377 ຄົນ ແລະ ສູນຫາຍ 5,130 ຄົນ ເມື່ອເວລາ 11:00 ໂມງ ຕາມເວລາທ້ອງຖິ່ນຂອງວັນທີ 10 ກັນຍາ.
ສໍານັກເລຂາທິການນາຍົກລັດຖະມົນຕີເນປານລະບຸໂດຍອ້າງອີງລາຍງານ RDNA ວ່າ: ໂຄງລ່າງພື້ນຖານເປັນພາກສ່ວນທີ່ໄດ້ຮັບຄວາມເສຍຫາຍຫລາຍທີ່ສຸດ ໂດຍຕ້ອງໃຊ້ເງິນ 3.1 ພັນລ້ານໂດລາ ເພື່ອບູລະນະຟື້ນຟູ ຫລື ປະມານ 75% ຂອງຄວາມຕ້ອງການຟື້ນຟູທັງໝົດ.
ສ່ວນຂະແໜງພະລັງງານໄດ້ຮັບຄວາມເສຍຫາຍຢ່າງໜັກເຊັ່ນກັນ ໂດຍເຫດການນໍ້າຖ້ວມ ແລະ ດິນເຈື່ອນສົ່ງຜົນກະທົບຕໍ່ໂຄງການໄຟຟ້າພະລັງນໍ້າ 13 ແຫ່ງ ມີກໍາລັງການຜະລິດທັງໝົດ 759 ເມກາວັດ ແລະ ໂຮງໄຟຟ້າພະລັງງານແສງອາທິດ 5 ແຫ່ງ ມີກໍາລັງການຜະລິດທັງໝົດ 24 ເມກາວັດ.
ລາຍງານປະເມີນວ່າ: ເນປານຈະຕ້ອງໃຊ້ເງິນ 2.56 ພັນລ້ານໂດລາ ເພື່ອຟື້ນຟູລະບົບພະລັງງານ ແລະ ໂຄງຂ່າຍໄຟຟ້າ. ຂະນະທີ່ການບູລະນະໂຄງລ່າງພື້ນຖານດ້ານຄົມມະນາຄົມຈະຕ້ອງໃຊ້ເງິນ 481 ລ້ານໂດລາ.
ນອກຈາກນີ້, ເຫດການນໍ້າຖ້ວມ ແລະ ດິນເຈື່ອນຍັງສ້າງຄວາມເສຍຫາຍຢ່າງໜັກຕໍ່ບ້ານເຮືອນ ແລະ ໂຄງລ່າງພື້ນຖານທາງສັງຄົມໃນເຂດຣະສຸວາ, ນູວາໂກ, ທາດິງ, ກໍຂາ ແລະ ຈິຕະວັນ.