ລັດຖະບານຍີ່ປຸ່ນຕາງໜ້າໂດຍ ທ່ານ ໂຄອິຊຶມິ ຊຶໂຕະມຸ, ເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງປະເທດຍີ່ປຸ່ນ ປະຈໍາ ສປປ ລາວ ໄດ້ເຊັນສັນຍາເອກະສານແລກປ່ຽນຮ່ວມກັບ ທ່ານ ນາງ ບຸດສະດີ ສັນຕິພິທັກ, ຫົວໜ້າກອງເລຂາຄະນະກໍາມາທິການແມ່ນໍ້າຂອງສາກົນ ເມື່ອມໍ່ໆມານີ້ ກ່ຽວກັບ “ໂຄງການເສີມສ້າງການຈັດການຄຸນນະພາບນໍ້າໃນອ່າງແມ່ນໍ້າຂອງຕອນລຸ່ມ” (ມູນຄ່າການສະໜັບສະໜູນ 424 ລ້ານເຢັນ).
ໃນຂົງເຂດແມ່ນໍ້າຂອງຕອນລຸ່ມ ທີ່ກວມເອົາ ຣາຊະອານາຈັກກໍາປູເຈຍ, ສປປ ລາວ, ຣາຊະອານາຈັກໄທ ແລະ ສສ ຫວຽດນາມ ຕ່າງກໍ່ປະສົບຄວາມສໍາເລັດທາງເສດຖະກິດຢ່າງເຂັ້ມແຂງ. ແຕ່ເຖິງຢ່າງໃດກໍຕາມ ບັນດາປະເທດເຫຼົ່ານີ້ກໍາລັງພົບກັບຜົນກະທົບດ້ານລົບທີ່ເກີດມາຈາກການເສື່ອມໂຊມດ້ານຄຸນນະພາບຂອງນໍ້າ ທີ່ກ່ຽວພັນກັບການພັດທະນາບໍ່ແຮ່, ການພັດທະນາອຸດສາຫະກໍາທີ່ວ່ອງໄວ ແລະ ການປ່ອຍນໍ້າເສຍ.
ຄຸນນະພາບຂອງນໍ້າມີຄວາມເຊື່ອມໂຍງໂດຍກົງກັບສຸຂະພາບ ແລະ ການດໍາລົງຊີວິດຂອງປະຊາຊົນ ໂດຍສະເພາະກໍແມ່ນນໍ້າດື່ມ, ການກະສິກໍາ, ການປະມົງ ແລະ ການທ່ອງທ່ຽວ. ດ້ວຍເຫດນັ້ນ, ການເສີມສ້າງມາດຕະການເພື່ອປັບປຸງຄູນນະພາບນໍ້າຜ່ານການຮ່ວມມືລະຫວ່າງບັນດາປະເທດແມ່ນໍ້າຂອງຕອນລຸ່ມຈຶ່ງກາຍເປັນສິ່ງທ້າທາຍອີກອັນໜຶ່ງ.
ໂຄງການດັ່ງກ່າວນີ້ມີເປົ້າໝາຍໃນການສະໜັບສະໜູນການພັດທະນາເສດຖະກິດແບບຍືນຍົງຂອງພາກພື້ນແມ່ນໍ້າຂອງໂດຍການເສີມສ້າງສັກກະຍະພາບໃນການສໍາຫຼວດ ແລະ ຈັດການຄຸນນະພາບນໍ້າໃນ 4 ປະເທດທີ່ກ່າວມາຂ້າງເທິງ ແລະ ສ້າງຮາກຖານສໍາລັບຄວາມຮ່ວມມືລະຫວ່າງປະເທດໂດຍຜ່ານການຈັດຫາອຸປະກອນສໍາຫຼັບການກວດສອບຄຸນນະພາບນໍ້າ ແລະ ການຫຼຸດມົນລະພິດໄປຈົນເຖິງການຊ່ວຍເຫຼືອດ້ານເຕັກນິກທີ່ກ່ຽວພັນກັບຄວາມອາດສາມາດໃນການຈັດການຄຸນນະພາບນໍ້າ.
ໂຄງການດັ່ງກ່າວນີ້ສະແດງໃຫ້ເຫັນເຖິງການຮ່ວມມືໃນດ້ານການຈັດການຊັບພະຍາກອນນໍ້າ ແລະ ຫຼຸດຄວາມສ່ຽງຈາກໄພພິບັດ ດັ່ງທີ່ໄດ້ລະບຸໄວ້ໃນ “ຍຸດທະສາດການຮ່ວມມື ແມ່ນໍ້າຂອງ-ຍີ່ປຸ່ນ 2024” ເພື່ອສະໜັບສະໜຸນຄວາມພະຍາຍາມໃນການຈັດການນໍ້າຂ້າມຊາຍແດນ.
ທ່ານທູດ ໂຄອິຊຶມິ ໄດ້ກ່າວສະແດງຄວາມຫວັງຈາກໃຈຈິງທີ່ຈະເຫັນໂຄງການນີ້ປະກອບສ່ວນຊ່ວຍສ້າງຄວາມສົມດູນລະຫວ່າງການອະນຸລັກສິ່ງແວດລ້ອມໄປພ້ອມໆກັບການພັດທະນາຢ່າງຍືນຍົງໃນອ່າງແມ່ນໍ້າຂອງຕອນລຸ່ມ ; ຂ່າວ : ສະຖານທູດຍີ່ປຸ່ນ ປະຈຳ ສ.ປ.ປ ລາວ